ఢిల్లీ సీఎం రేఖా గుప్తా ప్ర‌మాణ‌స్వీకారోత్స‌వానికి ప్ర‌ధాని న‌రేంద్ర మోదీ, కేంద్ర‌మంత్రులు, ఎన్‌డీఏ పాలిత రాష్ట్రాల సీఎంలు హాజ‌రైన విష‌యం తెలిసిందే. ఇదే కార్య‌క్ర‌మానికి ఏపీ నుంచి సీఎం చంద్ర‌బాబు నాయుడు, డిప్యూటీ సీఎం పవన్ క‌ల్యాణ్ కూడా హాజ‌ర‌య్యారు. ఈ ప్ర‌మాణ స్వీకార కార్య‌క్ర‌మంలో ఓ ఆస‌క్తిక‌ర స‌న్నివేశం చోటు చేసుకుంది. వేదిక మీదున్న ఎన్‌డీఏ నేత‌ల‌కు అభివంద‌నం చేస్తూ ముందుకెళ్తున్న ప్ర‌ధాని మోదీ పవన్ ను చూసి ఆగిపోయారు. ఆయ‌న‌తో క‌ర‌చాల‌నం చేయ‌డంతో పాటు కొద్దిసేపు ముచ్చ‌టించారు. ఆ స‌మ‌యంలో జ‌న‌సేనానితో ఏదో మాట్లాడుతూ మోదీ న‌వ్వులు పూయించారు. ప్ర‌ధాని మాట‌ల‌కు పవన్ తో పాటు ప‌క్క‌న ఉన్న నేత‌లు కూడా ప‌గ‌ల‌బ‌డి న‌వ్వ‌డం క‌నిపించింది. ఆ త‌ర్వాత సీఎం చంద్ర‌బాబును కూడా మోదీ షేక్ హ్యాండ్ ఇచ్చారు. పవన్, మోదీ న‌వ్వులు పూయించిన వీడియో ప్ర‌స్తుతం నెట్టింట వైర‌ల్ అవుతోంది.
