ఛ‌త్రపతి శంభాజీ మహారాజ్ వీరత్వాన్ని అత్యద్భుతంగా ఆవిష్కరించిన ఛావా సినిమా హిందీలో ఘనవిజయం సాధించిన విషయం తెలిసిందే. విక్కీ కౌశల్ శంభాజీ పాత్రలో నటించిన ఈ చిత్రం, విడుదలైనప్పటి నుండి సెన్సేషన్ క్రియేట్ చేసింది. లక్ష్మణ్ ఉటేకర్ దర్శకత్వంలో తెరకెక్కిన ఈ చిత్రానికి హిందీలో అద్భుతమైన స్పందన లభించింది. ఇప్పటికే బాక్సాఫీస్ లెక్క రూ.500 కోట్లను దాటడం విశేషం.దేశవ్యాప్తంగా అద్భుతమైన క్రేజ్ రావడంతో పాటు రీజినల్ లాంగ్వేజ్ లలో కూడా సినిమాను విడుదల చేయాలని సినిమాపై యూనిట్ పై ఒత్తిడి పెరిగింది. ముఖ్యంగా తెలుగు రాష్ట్రాల్లో కూడా శివాజీ మహరాజ్ కు అభిమానులు ఉన్నారు. ఇక ఆయన వారసుడి జీవితాన్ని వెండితెరపై చూడాలని బలంగా కోరుకున్నారు. ఇక వారి కోరిక మేరకు ఇప్పుడు ప్రముఖ గీతా ఆర్ట్స్ డిస్ట్రిబ్యూషన్ ద్వారా చావా సినిమాను తెలుగులో విడుదల చేసేందుకు సిద్ధమైంది.
అందులో భాగంగా, ఈ చిత్ర తెలుగు ట్రైలర్‌ను విడుదల చేశారు.తెలుగు ట్రైలర్ చూస్తే, సినిమాపై అంచనాలు మరింత పెరిగిపోతాయి. ముఖ్యంగా చత్రపతి శంభాజీ మహారాజ్ జీవితకథ, ఆయన వీరోచిత పోరాటాలు తెలుగు ప్రేక్షకులను సైతం ఎంతగానో ఆకట్టుకునేలా ఉన్నాయి. విక్కీ కౌశల్ శంభాజీ మహారాజ్‌గా నటించిన తీరును చూస్తుంటే నిజంగానే అప్పుడు మన ముందున్న మహారాజ్ కనిపిస్తున్నట్లు అనిపిస్తుంది. ఇక రష్మిక మందన్నా శంభాజీ సతీమణి యేసుభాయి పాత్రలో కనిపించి మరోమారు తన మినరల్ పెర్ఫార్మెన్స్‌ను చూపించారు. ఇక ‘ఔరంగజేబ్’ పాత్రలో అక్షయ్ ఖన్నా కనిపించిన విధానం ఈ సినిమాలో మరో హైలెట్. ఈ ట్రైలర్‌లో చూపించిన యుద్ధ దృశ్యాలు, రాజకీయ మర్మాలు, కుటుంబ బంధాలు, వీరత్వం..వంటి అంశాలు ఆసక్తిని కలిగిస్తున్నాయి. శంభాజీ కథను తెలుగులో చూడాలి అని ఎదురుచూస్తున్న జనాలకు ఇప్పుడు ఈ ట్రైలర్ మరింత హైప్ క్రియేట్ చేసింది.
